ინტერნეტმა დღეს ადამიანების ცხოვრებაში იმდენად დიდი ადგილი დაიკავა, რომ უმრავლესობას წარმოდგენაც არ აქვს, როგორ გაატაროს მთელი დღე ქსელის გარეშე. ინტერნეტით ვმუშაობთ, ვურთიერთობთ, ვამყარებთ ნაცნობობას და - დიახ, სექსსაც ვეწევით.

ვირტუალური სექსი დღეს არც იშვიათობაა და არც გასაკვირი. ამას ხელს უწყობს ეროტიული და პორნოგრაფიული საიტები, გაცნობის აპლიკაციები, ვებკამერები და უამრავი სხვა ინსტრუმენტი, რომელთა ნაწილი თავდაპირველად სულაც არ იყო სექსისთვის შექმნილი.

ბევრი ამ საკითხს სიცილით უდგება: რა საჭიროა მონიტორთან სექსი, როცა გარშემო უამრავი ცოცხალი ადამიანია? მაგრამ ასეთი შეგრძნებების მაძიებელთა რიცხვი დღითი დღე იზრდება. აქ საუბარი მხოლოდ მარტოხელა ადამიანებზე არ არის - ამ ხერხს ოჯახური წყვილებიც აქტიურად მიმართავენ, ხშირად სწორედ იმისთვის, რომ ერთმანეთს შორის ინტერესი გააცოცხლონ.

რა არის ვირტუალური სექსი?

სექსი ინტერნეტში თავისი არსით მასტურბაციაა სექს-სათამაშოების უზარმაზარი არჩევანით. ეს არის ვიდეოჩატი, პორნოგრაფიული რგოლები, ეროტიული ფილმები ნებისმიერი გემოვნებისთვის, ტექსტური მიმოწერა, ხმოვანი ზარები და კიდევ ბევრი რამ. ერთი სიტყვით, ადამიანს შეუძლია აირჩიოს ზუსტად ის, რაც უნდა. ქსელში სრულდება ნებისმიერი ეროტიული სურვილი და ის ფანტაზიები, რომლებსაც რეალურ ცხოვრებაში ხორცშესხმა არ უწერიათ.

გავრცელებულია მოსაზრება, რომ ვირტუალური სექსი მხოლოდ მარტოხელა ადამიანებისა და მოზარდების საქმეა. ეს მცდარი აზრია. ვირტუალურ სექსს მიმართავს მოზარდიც, კარგი მეოჯახე კაციც, სექსზე გახსნილი ქალიც და დიასახლისიც.

გასაკვირი არაფერია, რადგან არსით ეს არის განტვირთვის, მოდუნებისა და სიამოვნების მიღების საშუალება. ვირტუალურად შეიძლება ისეთი პარტნიორის არჩევა, რომელიც რეალურ ცხოვრებაში მიუწვდომელია, და საკუთარი კომპლექსების ერთი მოძრაობით გადახაზვა.

რეალურ ცხოვრებაში ადამიანების ნაწილი სასურველ პარტნიორთან საწოლში მოხვედრისას იძაბება და მხოლოდ იმაზე ფიქრობს, როგორ მოაწონოს თავი. სიამოვნებაზე ფიქრი მეორე პლანზე გადადის და შედეგად სექსი ისეთი არ გამოდის, როგორიც შეიძლებოდა ყოფილიყო. ინტერნეტში კი ყველაფერი სხვაგვარადაა: აქ არა მხოლოდ პარტნიორისა და ფორმის თავისუფალი არჩევანია, არამედ ადამიანი დაძაბულობისგან თავისუფლდება - იქცევა ისე, როგორც უნდა, და აკეთებს იმას, რაც უნდა.

დადებითი და უარყოფითი მხარეები

ერთი შეხედვით ინტერნეტსექსი მართლაც უფრო მოსახერხებელი ჩანს. აქ ვერ აიკიდებ ვენერიულ დაავადებას, არ არსებობს არასასურველი ორსულობის რისკი და არც ფიზიკური იძულების საფრთხეა. გარდა ამისა, აუცილებელი არ არის ადამიანი კარგად გამოიყურებოდეს. ვირტუალური სექსი ანონიმურია, თითქმის უფასო და ყოველთვის ხელმისაწვდომი.

თუმცა უსაფრთხოება აქ პირობითია. ეკრანის მეორე მხარეს ყოველთვის ცოცხალი ადამიანია და მოქმედებს იგივე წესები, რაც რეალურ ცხოვრებაში: ორმხრივი თანხმობის გარეშე არაფერი. გამოგზავნილი ინტიმური ფოტო შეიძლება მოგვიანებით შანტაჟის ან გავრცელების იარაღად იქცეს, ამიტომ ჯობია სახე ან ამოსაცნობი დეტალები კადრში არ მოხვდეს და პარტნიორის ვინაობა თავიდანვე გქონდეს გარკვეული.

მეორე რისკი მიჯაჭვულობაა. ბევრი ადამიანი იმდენად ეჩვევა ვირტუალურ სექსს, რომ რეალური უკვე აღარ აინტერესებს - აღგზნებას მხოლოდ მონიტორის წინ განიცდის. ეს არაერთი ოჯახის დაშლის მიზეზი გამხდარა.

თავიდან ასეთი კავშირები თითქმის ყველას შეიძლება მოეწონოს, მაგრამ თუ ინტერესი დროთა განმავლობაში არ სუსტდება, უკვე პრობლემაა - როგორც სექსუალურ, ისე ფსიქოლოგიურ სიბრტყეში. მუდმივი ვირტუალური სექსი იწვევს სამყაროსგან მოწყვეტას, რეალური კავშირებისგან თავის არიდებას და საბოლოოდ სოციალიზაციის სირთულეს.

საზღვარი მარტივია: სანამ ეს დამატებაა შენს ცხოვრებაზე, ყველაფერი რიგზეა. როცა ჩანაცვლება ხდება, უკვე შესაჩერებელი დროა.